Gyda datganiad ‘Argyfwng Hinsawdd’ gan Lywodraeth Cymru, mae Cyngor Bwrdeistref Sirol Rhondda Cynon Taf yn glir bod rhaid iddo chwarae ei ran wrth gymryd camau brys i liniaru'r risgiau sydd ynghlwm â'r Newid yn yr Hinsawdd.
Mae'r Cyngor wedi cydnabod y newidiadau sylfaenol sydd eu hangen i'r ffordd rydyn ni i gyd yn byw ein bywydau. O'r herwydd, mae wedi ymrwymo i ddod yn Awdurdod Lleol Carbon Niwtral erbyn 2030. Mae'r gwaith parhaus i ddatblygu rhwydwaith gwefru Cerbydau Trydan ledled Rhondda Cynon Taf i hwyluso'r cynnydd mewn perchnogaeth cerbydau trydan yn un o'r newidiadau niferus y mae'r Cyngor wedi ymrwymo iddyn nhw.
Mae gan y Cyngor ran ddylanwadol i'w chwarae o ran hwyluso'r cynnydd mewn perchnogaeth cerbydau trydan, gan gynnwys creu amgylchedd polisi cefnogol, trwy annog gosod cyfleusterau gwefru newydd ar gyfer cerbydau trydan, a hyrwyddo eu buddion i gynulleidfa ehangach.
Yn gynnar yn 2022, cyhoeddon ni ein Strategaeth Wefru Cerbydau Trydan, sy'n nodi ein 10 Uchelgais. Nod y rhain yw cydlynu dull gweithredu ledled y Fwrdeistref Sirol i hyrwyddo ac annog datblygiad rhwydwaith wefru cerbydau trydan cadarn yn y tymor byr, y tymor canolig a'r tymor hir.
Yn 2023, cyhoeddon ni ein Cynllun Gweithredu Gwefru Cerbydau Trydan sy'n darparu canllawiau a chyngor ar arferion gorau i ddatblygu rhwydwaith wefru cerbydau trydan cynhwysfawr ledled y Fwrdeistref Sirol. Mae hyn yn cynnwys cyfleusterau gwefru mewn ysgolion, mannau parcio i ymwelwyr a chwsmeriaid, yn y gweithle, mannau cyhoeddus a mannau parcio sy'n cael eu cynnal gan y Cyngor.
Mae’r Cynllun yn cyd-fynd â Chynllun Gweithredu sy’n gysylltiedig â Strategaeth Newid Hinsawdd y Cyngor. Mae'r Cynllun Gweithredu yn argymell y camau tymor byr, tymor canolig a pharhaus sydd eu hangen i gynorthwyo’r cynnydd a llywio’r ffordd ymlaen wrth gyflawni’r 10 Uchelgais dros y blynyddoedd i ddod.
Darparu pwyntiau gwefru ar y stryd i breswylwyr
Ar hyn o bryd, does dim modd i Awdurdod Priffyrdd Cyngor Bwrdeistref Sirol Rhondda Cynon Taf gefnogi gosod pwyntiau gwefru cerbydau trydan preifat ar y briffordd gyhoeddus, na gerllaw na throstyn nhw. Er budd diogelwch ar y briffordd ac mewn perthynas â chynnal a chadw yn y dyfodol, does dim modd i'r Awdurdod Priffyrdd ganiatáu llusgo ceblau, hyd yn oed gyda throshaen neu grid cilfachog, ar draws priffordd gyhoeddus neu lwybr troed, na sianelu ceblau o dan y llwybr troed. Mae hyn oherwydd materion atebolrwydd cyhoeddus, gan gynnwys y risg o ran baglu a materion diogelwch trydanol mwy cymhleth ar y pwynt defnydd.
Mae’r Cyngor yn gweithio i osod Mannau Gwefru Cerbydau Trydan mewn nifer o fannau parcio cyhoeddus ar draws y Fwrdeistref Sirol, yn agos at ardaloedd preswyl.
Darpariaeth Mannau Gwefru Cyhoeddus
Drwy gydweithio ag Awdurdod Trafnidiaeth Prifddinas-Ranbarth Caerdydd, mae'r Cyngor wedi sicrhau cyllid i osod pwyntiau gwefru cyflym 7kw i 22kw at ddefnydd cyhoeddus mewn 31 o feysydd parcio ledled Rhondda Cynon Taf. Mae’r rhaglen yn rhan o gynllun ehangach sy’n cael ei gyflwyno ar draws 10 awdurdod lleol ardal Prifddinas-Ranbarth Caerdydd. Y gobaith yw y bydd y rhaglen yn parhau i ehangu dros y blynyddoedd nesaf.
I gael yr wybodaeth ddiweddaraf am gynnydd y gwaith gosod, lleoliadau'r safleoedd wedi'u cadarnhau a sawl man gwefru fydd yn cael eu gosod, ewch i: Tudalen ymgyrchoedd gwefru cerbydau trydan.
Am ragor o wybodaeth a Chwestiynau Cyffredin sy'n ymwneud â gweithredu pwyntiau gwefru cerbydau trydan arfaethedig mewn meysydd parcio ewch i: Connected Kerb - Frequently Asked Questions
Darllenwch y dogfennau canlynol i gael rhagor o wybodaeth am Wefru Cerbydau Trydan yn RhCT a Chymru:
Am ragor o wybodaeth ewch i'n tudalen Dewch i Siarad am Wefru Cerbydau Trydan.
Cysylltwch drwy e-bostio: GwefruCerbydauTrydan@rctcbc.gov.u