Bydd Grant Mân Welliannau Canol y Dref yn darparu cefnogaeth ar gyfer mân welliannau a fydd yn gwella edrychiad allanol eiddo canol trefi. Disgwylir i'r cynllun gyfrannu at effaith er gwell ar olwg y strydoedd, gan esgor ar amgylchedd canol tref fwy deniadol, bywiog a diogel, a chynyddu'r gwariant mewn siopau a meithrin rhagor o fuddsoddi o du'r sector preifat.
Pwy sy'n gymwys i wneud cais?
Gwahoddir ceisiadau gan fasnachwyr canol trefi a pherchnogion eiddo gwag yn ardaloedd manwerthu canol trefi Aberdâr, Glynrhedynog, Llantrisant, Aberpennar, Pontypridd, Porth, Tonypandy a Threorci.
Os ydych chi wedi cyflwyno cais yn flaenorol, mae croeso i chi gyflwyno cais gyda chynnig newydd.
Am beth gaf i wneud cais?
Gall Grant Mân Welliannau Canol y Dref gefnogi busnesau yng nghanol trefi i gynnal gwaith adfywio bach ar flaen yr adeiladau, megis;
- Paentio blaen yr adeiladau
- Atgyweirio, ail-osod a glanhau gwaith maen neu rendr
- Atgyweiriadau i wydr, drysau, wynebau siop
- Atgyweiriadau i adlenni presennol
- Trwsio neu adfer nwyddau dŵr glaw
- Atgyweirio neu osod arwyddion (nid arwyddion â golau)
- Rhoi gorchudd powdr ar ddrysau rholer cyfredol
Swm y grant
Gall y grant gyfrannu 75% tuag at gost y gwaith cymwys hyd at uchafswm grant gwerth £2,000.
Os bydd angen i chi godi sgaffald neu logi sgip i ymgymryd â'r gwaith, gall y grant roi cyfraniad ychwanegol tuag at y costau penodol yma. Bydd hyn hefyd yn uchafswm o gyfraniad o 75% hyd at uchafswm grant ychwanegol o £500.
Cyflwyno cais
Os ydych chi'n credu y gallai eich prosiect fod yn gymwys, e-bostiwch y Tim Adfywio gan nodi eich enw, cyfeiriad yr adeilad masnachol (gan gynnwys cod post) a manylion y gwaith arfaethedig. Byddwn ni'n anfon ffurflen gais atoch chi os ydych chi'n gymwys.